صباح الخير والفل والورد والياسمين عليكو
يوم جديد وصباح جديد بنشاط جديد
اولا اعتذر عن التأخير فى كتابة البوست الجديد بس ده راجع لظروف الكلية وللحالة النفسية :)
المهم: امبارح ولاول مرة من اول الدراسة امسك الفرش والوان الزيت وارسم....!!! اكيد هتسألونى طب ازاى ؟؟
الدكتور اللى بيدرس لنا السنه دى (دكتور ايمن السمرى )فنان زى العسل ودماغة ما شاء الله عالية جدااا فى الرسم وليه اسلوب لوحده كده حتى فى التدريس والتعامل مع الطلبة...طب وبعدين... اول محاضرة دخل لنا فيها يااااه من اول السنه كده قال لنا انتوا خلاص بقيتوا طلبة ماجستير ومنكو اللى هيكون معانا فى التدريس السنه الجاية فانا مش هفرض عليكو موضوع معين تشتغلوه!! كلنا بصينا لبعض ..بيقول ايه الراجل ده .. طب ازاى ؟
وكأنه قرا افكارنا قال لنا انا عارف انكوا الاربع سنين اللى فاتوا بترسموا موضوع اللى يحدده الدكتور بس ما ينفعش الرسم ده عبارة عن حالة الفنان ومشاعره واحاسيسه ولازم الموضوع اللى يرسمه يكون حاسه قبل ما يخرج على الورق ...والله كلام معقول بس ازاى !! داحنا طوول الاربع سنين اللى فاتوا وكل دكتور يدخل لنا يقول على الموضوع ودوروا انتوا بقى حابين الموضوع او لأ دى مش مشكلته دى مشكلتنا احنا بس المهم ان الموضوع يجيله خاالص بعد فترة معينه ساعات اسبوع وساعات اتنين ...طب وبعدين
كمل كلامه وقال كمان انا مش هفرض عليكو انكوا تحضروا او لأ او تشتغلوا حتى اللى بيحب محاضرة التصوير هيحضر واللى حابب يشتغل هيرسم اهم حاجة يوم ما تمسكوا الفرش والالوان تكونوا حابين الموضوع اللى هترسموه وده هيبان فى الشغل وانا هقيمكوا اخر السنه على كده (مدى حبكوا للموضوع اللى بترسموه)وانا خبرة بقالى كتيير واقدر اعرف ده من رسمكوا...والله ده راجل زى العسل وكلامه مظبوط جداااا بس احنا متبرمجيـــــــن
بس بقى ومن اول السنه وانا بعصر فى دماغى مش لاقيه حاجه ممكن ارسمها وبحضر المحاضرة (زى القلة) _لا مؤاخذة يعنى _ اصلى لا بجيب شغل ولا بشتغل حتى فى المحاضرة
المهم كنت مضايقه من نفسى اووى خاصة ان حوالى 99% من السكشن كانوا بيشتغلوا ...يااااه شكلى وحش اووى ...بس فى نفس الوقت مكنتش لاقيه نفسى ومكنتش قادرة اشتغل ( وده نفسيا مش عضويا )
المهم من اسبوعين كده اشتريت الوان وفرش جديده وشاسيه للرسم ..قلت هه يمكن ارسم .. بس مفيش فايده بكلم فى نفسى ومفيش استجابة
لحد امبارح بس (والحمد لله) وانا قاعده كده لا بيا ولا عليا حسيت ان ايدى بتاكلى عشان ارسم _مع انى كنت مرهقه جدااا _ بس لأ يا بت يا أميرة ما ينفعش قومى اشتغلى
سميت بإسم الله وقمت واشتغلت الحمد لله لحد الساعه 3 الفجر تقريبا ...يمكن اللوحه ما خلصتش بس حسيت انى استريحت مرة من ناحية انى رسمت ومرة تانيه من ناحية انى قدرت اكتب لكوا
مقدرش اقول حاجه غير الحمد لله على نعمة الموهبة والحمد لله ان الحاله اللى عندى راحت والحمد لله انكوا معايا بس يارب افضل كده
اخر حاجه بقى عشان انا عارفه انى رغيييت كتير وطولت عليكوا: ممممم
مش عارفه احط عنوان للموضوع فعشان كده حسيبه
بـلا عنـــوان
